Aliyekuwa Naibu Rais, Rigathi Gachagua, ameondoa rasmi ombi lake la kurejeshwa madarakani katika kesi yake inayoendelea mahakamani ya kupinga mchakato wa kuondolewa kwake madarakani.

Katika kikao cha mahakama kilichofanyika Jumatatu mbele ya jopo la majaji watatu; Eric Ogolla, Anthony Mrima, na Freda Mugambi, mawakili wa Gachagua waliieleza mahakama kuwa ombi lililorekebishwa halilengi tena kumrudisha katika nafasi ya Naibu Rais na badala yake, sasa kesi hiyo inalenga kudai fidia pamoja na matamko ya kisheria kwamba mchakato wa kumuondoa madarakani ulikiuka Katiba na taratibu za kisheria.

Wakiongozwa na Wakili Mkuu Paul Muite, timu ya wanasheria ya Gachagua iliambia mahakama kuwa mteja wao anadai malipo ya stahiki zake, fidia ya madhara aliyopata, pamoja na hasara zilizotokana na kile anachodai kuwa kuondolewa madarakani kinyume cha sheria na taratibu.

“Mlalamishi ameondoa ombi la kurejeshwa kama Naibu Rais,” mahakama iliambiwa.

Gachagua anasisitiza kuwa mchakato ulioendeshwa na Bunge ulikuwa kinyume cha Katiba, haukufuata utaratibu unaostahili, na haukufikia viwango vinavyohitajika vya ushiriki wa umma kwa mujibu wa sheria.

Anadai kuwa ushiriki wa umma haukuwa wa maana, akieleza kuwa wananchi walipewa tuhuma na madai ya makosa bila kupewa taarifa kamili au mtazamo uliosawazika ili waweze kutoa maoni yenye uelewa mpana.

Kwa mujibu wa Wakili Muite, Kifungu cha 151 cha Katiba kinapaswa kutumika kwa kipindi chote cha miaka miwili ambayo Gachagua alihudumu kama Naibu Rais, na kwamba mchakato wa kumuondoa haupaswi kutumika kwa namna ya kurudishwa nyuma.

Kwa mujibu wa hati ya madai, mchakato huo ulipangwa kuhalalisha matokeo yaliyokuwa yameamuliwa tayari, badala ya kukusanya maoni halisi ya wananchi.

Aidha, Gachagua anadai kuwa taratibu zilizotumika zilipuuza kinga za kikatiba na kumnyima haki ya kusikilizwa kwa njia ya haki na halali.

“Inasemekana siku aliyopaswa kujitetea, aliugua. Hata hivyo, Seneti iliendelea na mchakato huo na kuidhinisha mashtaka 5 kati ya 11 dhidi yake. Hakukuwa na juhudi yoyote ya dhati kutoka Bunge la Kitaifa na Seneti kuchunguza kwa kina ukiukwaji mkubwa wa Katiba,” alisema wakili Muite.

Aliongeza kuwa madai yaliyowasilishwa dhidi yake hayakuwa na uzito unaohitajika kisheria; yalikuwa ya jumla, yasiyo na maelezo ya kutosha, na hayakuwa na msingi thabiti.

Mahakama imeelezwa kuwa Gachagua ana hoja 18 anazotaka jopo hilo la majaji watatu kuamua katika kesi yake.

Kikao kijacho cha usikilizaji wa kesi hiyo kimepangwa kufanyika Mei 7, huku kikao kingine kikitarajiwa Mei 8. Hapo awali, upande wa Gachagua ulikuwa umepanga siku tatu mfululizo za usikilizaji, lakini mahakama ilieleza kuwa haiwezi kuketi siku zinazofuata kutokana na usaili wa majaji wa Mahakama ya Juu, ambapo Jaji Mrima ni miongoni mwa wanaosimamia mchakato huo.